الوسم: المقلى

ان شاء الله تكونو جميعا فى أتم صحة وأسعد حال

النهاردة جبتلكم طريقتى المتواضعة فى قلى السمك النيلى ونوعه اسمه (بلطى ) وطبعا لذيذ جدااااا وطعم وأسألو أى واحدة مصرية عليه

الشرط الأساسى ان يكون السمك طازة يعنى تشوفيه فى السوق وهو بيلعب كده فى الماية والا النتيجة مش هتكون أد كده

بعد ما ننظف السمك من جوه ونغسله من بره كويس ونشيل القشر من عليه بليفة أو سكينة

نحضر الخلطة اللى هننقع فيها السمك
لكل كيلو سمك بتكون عبارة عن :

راس توم صغيرة + معلقة ملح كبيرة + ملعقة كمون متوسطة + ملعقتين خل + ملعقة زيت ذرة + ليمونة بقشرها

بالاضافة الى شطة حمرا للناس اللى بيحبوا الحااار وانا مش منهم

نحط كل المكونات دى فى الخلاط ونضربهم بيبقوا زى العصيدة فى النهاية وهى دى الحشوة والنقعة للسمك

نشق السمك كل سمكة يادوب شقين بالسكينة من كل جهة ويتم دعكهم بالنقعة وحشو الداخل بيها

وبعدين نحط السمك فى علبة محكمة الغلق ونحطه فى التلاجة لمدة ساعة او 2

ونقليه فى زيت النوع اللى يعجبك انا بفضل عباد الشمس
بحط كمية زيت بسيطة جدا مش زيت عميق يعنى يادوب تغطى قاع القلاية

ويكون الزيت سخن ونحط السمكة فيه بس 3 او 4 دقايق على كل وش
وده شكلها النهائى :

أنا بحب أقدمها مع رز سمك اللى بعمله بالبصل والتوم والبهار والطماطم وأقدمه مع عصير برتقال لاااااازم وطماطم بكمون وملح وخل فقط

طريقة سهلة وبسيطة والنتيجة مرضية ان شاء الله