العُقد كشف معدنها
السلام عليكم ورحمة الله وبركاته
انا من المقيمين في هذا المنتدى ومعظم وقتي في هذا القسم أساعد قدر
المستطاع في أيجاد حلول لمشاكل العضوات الفاضلات
واليوم اريد مساعدتكم وأفكاركم في مشكلتي .
قصتي كانت في يوم عند وحده لاهي قريبه ولاهي صديقه حيل
بس من نفس الفريج او بمعنى اخر حارتنا
فكانت تتكلم عن الألماس بشغف وتريد تشتري وماحصلت الي نفسها فيه
فقلت لها بعد ما تشترينه راح تملينه بعد كم لبسه نفسي
كان عندي عقد اشتريته من كم سنه والحين ما لبسته من سنين
قالت كيف شكله فوصفت لها الشكل فقالت … ابشتريه منك
وقامت ترددها مثل المجنونه
تفأجئت وقلت لها أنا ما افكر ابيعه
جلست تلح علي وانا بس ابتسم واضحك من اسلوبها
ف كل ما التقينا كان كل كلامها عن العقد حقي. وتعرض تشتريه
وقالت لو طلع وزنه كذا راح ازيدك فوق المهم قالت ليش ماتبين تبيعينه
مو قلتي انك ما تستعمليه من سنين عيل ليش ما تبين تفرحين قلبي
وجلست تحرج فيا وتقول ضروري ابيه فقلت لها يمكن ما يعجبك ولا هو الي في بالك
قالت ابا اشوفه جبتها ووريتها على امل تغير رايها
بس شفت العكس زادت تبي تشتريه
وانا من كثر ما اقول لا ماافكر ابيعه سكت وتبتسم من كثر الاحراج
المهم يوم من الأيام ماجاني نوم فجلست افكر في الموضوع
فقلت ليش مااروح اشوف كم سعره والصبح رحت عند الصاغه وزنته
وطلع وزنه كويس زاد اربعه اضعاف سعره لان الذهب مرتفع هذي الفتره
ما اخبي عليكم عجبني السعر طلب مني صاحب المحل انه يشتريه
فرفضت لأن إذا بابيعه اكيد راح يكون للحرمه هي اولى هي الي دخلت الفكره في راسي رغم رفضي
اتصلت بزوجي وقلت له السالفه فقالي حلو السعر وايد بيعيه في المحل
مو للحرمه فقلت له لالا مستحيل الحرمه اولى به وهي ميته عليه تباا
فقالي انه المحل اضمن واسلم هذي ماتعرفين عنها شي وكيف هي فلا يغرك كلام الناس
فقلت له ليش تقول عليها كذا وتظلمها ونحن بعد ما شفنا عليها شيء
كل مافي الامر سلم وأستلم مافي مشاكل إن شاء الله
وبالفعل كلمتها وفرحت كثير. وقالت بجي اليوم اسلمك الفلوس
وجات وانا جبت العقد مدت لي الفلوس وقالت ؟؟؟
عادي اعطيك الحين هذا المبلغ والباقي الشهر المقبل
انا انحرجت ووافقت عطتني 17000 وهذا تقريباً ربع المبلغ
وسلمتها العقد فقالت خليه عندك لين يكمل المبلغ
إذا تبين فقلت لها لا خلاص خليه وأنا واثقه فيك
لما خبرت زوجي عصب وقالي ليش وافقتي يا المبلغ كله يا بلاش
قالي هذا البدايه وبعدين ماراح تعطيكي شي قالي رجعيلها فلوسها وخدي ذهبك
رفضت بقووة وقلت له خلاص هي تبا مهله شهر لا غير وانا وافقت
بعد الشهر يصير خير
بنات ،. مر الشهر ولا فتحت لي الموضوع من اساسه
ولما نتقابل ما تفتح سيرته ابد وانا احاول اللمح ومافي فائدة
فزوجي جلس يقولي وين الشهر جاء وما شفنا شيء
بصراحة ياني ضيق كبير من الثقه الي عطيتها اياها وهي ما وفت بوعدها
وجلست طماطل لما جيت اخبرها اني محتاجة باقي المبلغ
وقلت لها انتي قلتي انك جاهزه لشراء وماينقصك فلوس
فقالت زين وراحت جابت شوي من المبلغ 8000 وبقى عندها اكثر من نص المبلغ
بصراحه نفسيتي تعبت من كلام زوجي ومن فعلتها خذلتني
وصار زوجي يعطيني مواعظ في الناس لما يأخذون دين عقب يتهربون
ليش سوت كذا وجلست تعطيني بالقطارة فلوسي
انا خجلانه اعصب عليها ماقدرت اقسى عليها
الحين قلت في بالي بعد ما تجيب الفلوس كامله بقطع علاقتي فيها
لانها ماتستاهل
بس ابي افكار منكم تخليها ترجع باقي الفلوس ومره وحده
لأن الي باين راح تنقط علي وانا ماابا كذا ابد ابا المبلغ كامل
خبرتها اذا ماعندها ترجع العقد وتأخذ فلوسها بس قالت لا عندي
وكل مره تقول اول الشهر وتجلس تنقط علي مر الحين شهرين وداخلين في الشهر الثالث
رايكم كيف استرد باقي المبلغ كله بدون ما اجرحهااا
انتظر بشوق أفكاركم ،.،
ماتسحتي هاذي والله
اختي لاتستحين منها
قولي لها يتجيبن لي المبلغ كامل
او ارجع لك فلوسك واخذ عقدي
اذا سكتي عنها مابتشوفين شي
المشاركة الأصلية كتبت بواسطة فآتن  حبيبتي قصتك عبرة لكل وحدة تثق في ناس ماتعرفهم
هي قالت لك من الأول فلوسي كاملة وبعطيك زيادة
ايش خلاك تعطيها بربع المبلغ؟
وترى زوجك نصحك < هو أدرى بمصلحتك
ترى العيب فينا مانسمع نصايح أزواجنا
ياما حذرونا وطلع كلامهم صح
ماعلينا
انا صارلي موقف شبيه بموقفك
ووعدتني الحرمة أول شهر 3 تجيبه كامل
جا شهر 3 ايش قالت؟
شهر 5 أجيبه لك
قلت لها انتي قلتي شهر 3 وانا بحاجة للفلوس
نكرت وقالت انا قلت شهر 5 < وانا احرجتها وقلت لها انا متأكدة قلتي شهر 3
رغم انها صديقة وعزيزة على قلبي
لكن الحق حق
جا شهر 5 اعطتني نص المبلغ
والله قعدت وراها لين أخدته كامل بالتقسيط
هي على قد حالها وأمينة يعني راح ترجعه < بس ماتقدر كامل زي ماوعدتني
بس قلت في نفسي لازم اصبر عليها < لأن الغلط غلطي
انا اعطيتها الفلوس وانا بحاجة ماسة لها
اتحمل النتيجة
وأولا واأخير وقت اعطيتها الفلوس قلت يارب استودعتك مالي اجعلها ترده كامل
والحمدلله رجعته.
اصبري عليها ياحبيبتي اصبري واستودعي الله مالك راح يرجعلك رغم أنفها
بس أهم شي لاتعديها كل شهر دقي واسالي عالفلوس
احرجيها على قد ماتقدري علشان تستحي
أهم شي فيه شهود ؟ علشان ماتقدر تنكر حقك
ولاعاد تثقي في الناس طيبتك خليها في لسانك وتعاملك معاهم بعيد عن الفلوس والأمانات.
وربي يرد فلوسك كاملة علشان ترتاحي.
|
افتكرت موضوعي ما نزل
لاني شيكت عليه مالقيته الحين شفته بصدفه في توقيع مشكلتي
المهم
مشكوره على ردك ومساعدتك
للأسف مافي شهود غير الباب ههههه
وانا خلاص اخذت عبره
بس زوجي يسمعني كلام عن الموضوع وعدم خبرتي في الناس
المشاركة الأصلية كتبت بواسطة أخصائية نفسيةة طيب دقي عليها تليفون وقولي برجع لك فلوسك وعطينيالعقد احسن لك
|
هذا فكرتي زوجي بعد ودقيت لها
وقلت لها إذا ماعندك خلاص برجع الفلوس
ورجعي العقد
قالت لا عني اول الشهر
وقالت العقد اصلا ماعاد عندي اختي خذته بتستخدمه في عرس قرايبها
مشكوره على ردك يالغلا
