غلطه قديمه وانتهت لكـن بقـا الجـرح العميـق
اللـي يبـي يبقـى علـى مـر الليالـي مالتئـم
آسف لاني ماقدرت اصبـر وغيـرت الطريـق
وآسـف لانـي ماقـدرت افهَـم اللـي مافـهـم
بركت للحمل الثقيل وطقت لـو ماكنـت اطيـق
مـن شـان لاقالـوا زيـاد يقـال والله والنعـم
لكـن نعـم مفعولهـا ماياصـل يديـن الغريـق
اللـي لمـد ايديـه لـلـي مايطيقـونـه سـئـم
ولاعاد يسوى فـي عيونـه لازفيـر ولاشهيـق
شيئ يجـي , تقفـاه منـه يقطعـه لوهـو نسـم
مسرح جريمة قصتي اكثر غموض من الحريـق
اللـي تضيـع بـه الدلائـل والقرائـن والتهـم
مافيـه امـر مـن الصديـق لياتنكـر للصديـق
ولافيـه بالدنيـا اهـم مـن المهـم الا الاهــم
الياصرت بالحالك فريـق وفيـه قدامـك فريـق
وتخاف بكره لانهزمـت يقـال مسكيـن انهـزم
خذلك طريـق تظمـن انـه بالنهايـه مايضيـق
وان طعت شوري خذ طريق الله ترى مابه نـدم
وانا استخرت الله وعيني خايلـت قمـة طويـق
القمـه اللـي فوقهـا رفـرف للامجـاد العـلـم
والله لعانـق راسهـا مادامنـي حــر طلـيـق
حر اليامنـه شلـع مـن سرعتـه مثـل السهـم
ماعادت احلامي على خبرك ترى خبرك عتيـق
وان شفت بعيونك هرم , حلمي على راس الهـرم
لي مده احلامي من العالي علـى الجزلـه تويـق
صافحت كف المستحيل وقـال : مـد ام الشحـم
انا برئ مـن اي حلـم يلبـس ثيـاب الرقيـق
ان ما امتطى صهوة جواد العـز بالله واعتصـم
طموحي اخدم امتي وان مت يبقى اسمي عريـق
قبلـي فهـد خـادم لبيـت الله وعبـد الله خـدم
اقسمت ما انسى واجبي واخترت لي درب يليـق
وانا هنا والا هنا مـا انسـى انتمائـي والقسـم
مادام نيشان الفخر له في سماء صـدري بريـق
وشلون نيشان الولا اللي داخل القلـب انرسـم!!
جدي وابوي معاهديـن الديـن بالعهـد الوثيـق
وانا على نفس الطريق اقسمت والوضع انحسم..!!
لحامل البيرق الموسم الثالث زياد بن حجاب بن نحيت
خذلك طريـق تظمـن انـه بالنهايـه مايضيـق
وان طعت شوري خذ طريق الله ترى مابه نـدم
قصيده رائعه ونقل أروع غاليتي دمتي بود,,
مشكوره اختي الغاليه
على الطرح الرااائع
الله يوفقك
