نصائح للمقبلين على الزواج

ازيكم يا احبابى عاملين ايه فى البرد ده انا عندى الدفايه باظت النهارده وعقده متلجه المهم حخش فى الموضوع
كل واحده داخله على جواز جديد بتحلم بالعش اللى حيضمها مع جوزها وبعد ما يخلص شهر العسل تبدء تكتشف حاجات جديده فى زوجها ما كنتش موجوده من قبل وعشان كده حقولكم شويه نصائح

1-انت عارفه انك اجوزتى شخص من بيئه مختلفه عنك وله طباعه وسولكياته وافكاره المختله عنك عشان كده متقوليش ان احنا افكارنا مش واحده ومش مناسبين لبعض لانك مش حتلاقى تواءم ليكى فى كل تصرفاتك يعنى حاولى تستوعبى ده وتتعاملى مع شخصيته بهدؤ وفى مثل بيقول كل حله بتلاقى غطاها والحله طبعا شكلها مختلف تماما عن الغطاء(اكيد انت فهمانى)

2-شهر العسل بينتهى وجوزك بيروح لشغله يعنى لو ما كنتيش موظفه حاولى تشغلى وقت فراغك باى هوايه عندك عشان ماتتعلقيش بزوجك تعلق زياده ودا بيسبب مشكله بعد كده ومتقطعيش صلتك باصدقائك او باقاربك عشان ما يبقاش هو الوحيد اللى فى حياتك

3-لازم حبيبتى تدفعى جوزك للعمل وتشجعيه من البدايه عشان يتعود على تحمل المسؤليه متقوليلوش خليك قاعد جنبى النهارده وانتى بعد كده اللى حتكروشيه من البيت

4-عليكى حبيبتى انك تتكلمى مع جوزك فى اى موضوع تختاريه من مجله او من التلفزيون اومن النت عشان يبقى بينك وبينه حوار ودا بيقرب بينكم كتيير وعشان كمان مايكونش بينكم ما يسمى بالخرس الزوجى

5-وكمان لازم يكون منظرك جميل قدامه على طول ومش معنى كده انك تغرقى وجهك بالمكياج بس المنظر الجميل بيكون بالنظافه الشخصيه والرائحه الطيبه والوجه البشوش والشعر المتسرح وانت عارفه الشعر لما بيتنكش بيبقى شكله ايه

6-واخيرا واهم حاجه ان اى مشكله بينك وبين جوزك تحليها معاه ومدخليش حد بينكم مهما كان صلته بيكى لان المشكله لما بتخرج بره البيت بتكبر وكل واحد من الاتنين بيعند

واتمنى انك تستفيدى من النصائح دى لانها والله عن تجربه وادعولى: