السلام عليكم ورحمة الله
انا دايما لما بعمل تورتات
بستخدم دقيق الاسبونش الجاهز بس فيه ناس كتير بعتولى وقالولى انه مش متوفر عندهم او فى المكان اللى هما عايشين فيه فعشان كده حبيت اعمل الكيكة الاسفنجية بالطريقة الكلاسيكية فى البيت وطريقتها سهلة جدا واى حد يقدر يعملها
مكونات الكيكة:
2 كوب الا ربع دقيق
ربع كوب نشا
كوب سكر
5 بيضات كبار
ملعقة ونصف صغيرة بيكنج بودر
ملعقة صغيرة فانيليا سايلة
وطبعا لازم المكونات كلها تكون بدرجة حرارة الغرفة
مكونات الحشو والتغليف:
2 كوب كريم شانتى
خام
5 ملعقة كبيرة لبن بودرة
5 ملعقة كبيرة سكر بودرة
2 كوب ماء مثلج
نصف ملعقة صغيرة لون طعام اخضر بودرة
وللتزيين هنحتاج:
عجينة فوندان ملونة
الطريقة
بالنسبة للكيك اول حاجة فى إناء هنحط البيض مع الفانيليا
ونضربهم بالمضرب الكهربائى لمدة لاتقل عن دقيقتين
وفيه ناس هتقول كمية البيض دى قليلة بس انا شايفاها مناسبة والموضوع مش بالكمية اهم حاجة مدة الخفق ده اللى بيفرق فى النتيجة
وهيعملوا رغاوى
ونحط عليهم كل كمية السكر
ونضربهم على اقصى سرعة لمدة لاتقل عن 10 دقايق متواصل
لغاية مايبقى لونه فاتح ويتكاثف ويبقى كريمى ويعمل علامة زى الشريط او رقم 8 لما نشيل من عليه المضرب
وهننخل الدقيق والنشا والبيكنج بودر ونحطهم على الخليط(والنشا فايدته انه بيدى طراوة للكيكة)
ونقلبهم من فوق لتحت بالأسباتيولا وبرفق
لغاية ماتختفى كل كمية الدقيق ونحطها فى صينية مدهونة
وخبزتها فى فرن منخفض الحرارة وطبعا كل واحدة فرنها يختلف عن التانى واختبرتها وطلعتها
ونقلبها على ورق خبز
وسبتها فى التلاجة لمدة يوم كامل عشان تتماسك
وجهزت ادوات التقطيع والحشو
وقسمتها ل3
وطبعا الكيك الإسفنجى ليه طرق كتيييييييييييير جدا متتعدش بس انا حبيت اعملها بأسهل واسرع طريقة
وهنجهز
الحشو هنحط المكونات كلها على بعض
ونخفقهم كلهم لغاية مانحصل على قوام الكريم شانتى المطلوب واللون كمان نشوف اذا كان محتاجين نزوده او لاء
وبالنسبة للون انا اخترته لأنى حبيت اغير عشان دايما ابيض او شوكولاته وطبعا تقدروا تغيروا للون اللى بتحبوه
وهنبدأ نحشى الكيكة
ونقدر نحط عليها سيرب او مربى قبل مانحط عليها الكريم شانتى ده حسب رغبتكم
وهنغلفها بالكريم شانتى وهنمشى عليها من فوق بالشوكة او بمشط الحلويات المشرشر
وهنستخدم القمع المشرشر عشان نعمل شكل السبت
بالنسبة لشكل السبت هنعمل خطوط رأسية
وهنمشى عليها بالخطوط الأفقية هنمشى على عمود ونسيب اللى بعده وهكذا وصف الخطوط الأفقية التانى هيبقى عكس اللى فوقه عشان يدينا شكل السبت
ولازم العواميد الرأسية يكون عددها زوجى عشان اخر عمود يقفل مع اول عمود
وهيدينا شكل السبت على جناب التورتة
كده خلصنا الجزء الرئيسى وهنيجى لأخر جزء فى التزيين هنجيب عجينة الفوندان الملونة اللى عندنا ونختار الألوان اللى عايزنها
بالنسبة لعجينة الفوندان انا بشتريها جاهزة وبلونها فى البيت ده لما مش بلاقى الملونة بس طبعا الأسهل انكم تشتروا الملونة جاهزة لأن تلوينها بياخد منى وقت كبير ومجهود وهنجيب قطاعات الفوندان البلاستيك اللى هتدينا شكل الورد
وهنفرد عجينة الفوندان على نشا ونضغط عليها بالقطاعات
بالنسبة لعجينة الفوندان فيه ناس كتير بتشتكى انها بتكون معاهم مفتفتة او ناشفة جدا الحل انكم تسخنوها على حمام مياه زى مابنسيح الشوكولاته وبمجرد ماتسخن وتبقى طرية نشيلها ونعجنها بإيدينا هترجع معانا زى اول ماشتريناها وهتبقى قطعة واحدة وطرية
انا حطيت الورد وكتبت على التورتة بنفس عجينة الفوندان لأن التورتة دى صديقتى طلبت منى اعملها لوالدتها
وده شكلها النهائى
ودى بعد ماقسمتها
يارب موضوعى البسيط ده يكون عجبكم
ماشاء الله روعة تسلم الايادي
ما شاء الله روعة
تسلم ايدك يستحق التقييم والتثبيت
شكلها جميل تسلم ايديكى
ماشاءالله
تسلم ايدك
