تجربتي مع بنتي في التحكم بالتبول مشاركتي في مسابقه طفلك لأفضل مقال

مشاركتي في مسابقه طفلك لأفضل مقال عن تجارب أمهات سيدتي

دي تجربتي في تعليم بنتي دخول الحمام يارب تفيدكم كلكم

أنا بدأت مع بنتي و هيه عندها سنه و نص دكاتره الأطفال بينصحوا ان السن المناسب ثلاث سنين بس أنا شايفه ان كل ما بدأتي بدري كان ترسيخ العادات أحسن و كمان أوفر لأنك هاتوفري ميزانيه شراء البامبرز هههههه

أول حاجه عملتها خلعت البامبرز من بنتي و فضلت يومين إراقبها كل ماتعمل حمام اكتب الوقت و بعدين قدرت أحدد هيه بتعمل حمام بول كل ساعه تقريبا و مره واحده براز ملهاش وقت محدد

في أول يوم في المعركه ههههه أقصد أول يوم أبدا فيه تعويدها اشتريت بوتي دا اسمها بالانجليزية معرفش اسمها ايه في مختلف اللهجات بس موجودة في محلات لوازم الأطفال و مخصصة لتعويد الطفل علي التحكم في الحمام و منها اشكال كتير أنا اشتريت واحده علي شكل سيارة لأني جربت مع البنت و هيه صغيره الشكل التقليدي و خافت منها جدا

أول ما البنت صحيت من النوم أجلست البنت عليها الأول صرخت و كانت عايزه تقوم لكن بمنتهي الهدوء و الحنان أخذتها في حضني و بوستها و أجلستها مره تانيه و أنا محوطه أيدي بكل جسمها عشان تطمن و مش تخاف و كل ما تحاول تقوم أرجعها مكانها تاني بس من غير عصبيه و دائما كنت بضحك معاها و أغني ليها و فضلنا كده لغايه ما عملت حمام بول أول ما عملت الحمام صقفت ليها و قولتلها شاطره و بوستها كتير عشان تفهم انها عملت حاجه حلوه

و بعد كده من حساباتي و ملاحظاتي قرب ميعاد الحمام بفتره أخذتها أجلستها علي البوتي بمنتهي الحنان و خلي بالك ان الصراخ و العصبيه بيخوف الطفل و بيخليه يعند جدا و يرفض التدريب المهم البنت تاني مره ما كانت خائفه زي المره الأولي و كررت الخطوه الأولي حتي تم المراد ههههه و تاني كررت التشجيع

طبعا كان فيه مرات بتفلت مني و بتعمل حمام و هيه واقفه كنت مش بتعصب كنت بقولها بهدوء مع نبره حزم واضحه كده لا إنتي كبرتي عشان تفهم ان ده سلوك مرفوض بس من غير ما اخوفها

كنت براقب بنتي طول الوقت و أول ما أحس انها ساكته و سرحانه أعرف انها هاتعمل براز أقوم الحقها قبل ما تبهدل الدنيا ههههه و الأطفال بيفضلوا اللعب علي أي حاجه في الدنيا و ده اكتر وقت كانت بتنسي تقولي انها عايزه تعمل حمام

في الليل كنت مش بخليها تشرب ميه كتير و خصوصا قبل النوم بساعه و كنت بخليها تعمل حمام اكتر من مرتين في خلال النوم و لازم اتاكد انها متنبهه و صاحيه مش نايمه و كنت بخليها تنام و هيه لابسه البامبرز عشان مش تبرد لو نمت و مش لحقتها

كنت كل مره هاقعد بنتي تعمل حمام أقولها بيبيي عشان تعرف تقولي لما تكون عايزه تعمل بس هيه سمتها بف ههههه مش عارفه ليه المهم أي حاجه نتواصل بيها

بعد فتره بدأت بنتي تتحكم في نفسها شويه و كنت بشجعها دائما و بقول لابوها عشان البنت تحس انها عملت عمل بطولي و عمري ما قارنت بينها و بين حد ولا احرجتها قدام أبوها أو أي حد لو غلطت عشان مش تحبط

بعد فتره اتعودت اكتر و بقي فيه ثواب و مكافاه كبيره علي الالتزام و عقاب بعيد عن الضرب

بعد فتره التزمت و كمان اتعودت علي الحمام العادي بتاعنا بس كنت بمسكها و ارتحنا من البامبرز اللي كنت بلبسه ليها بس لو خارجين مكان بعيد و مش متوافر أي حمام و هيه كانت بتمسك نفسها مش بتعمل إلا في الحمام

دي تجربتي أرجو انها تفيدكم و بنصح كل أم في الفتره دي خليكي هاديه و صبوره و حنونه و كمان لازم تبقي حازمه جدا و ان شاء الله تعدي المرحله دي علي خير

و ماتنسوني من صالح دعائكم

اللهم بارك لي في ذريتي و اجعلهم من البارين بي في حياتي و المتذكرين لي بالدعاء بعد الممات

تجربه موفقه وراااااائعه

ـأسعدني طرحك لتجربتك ~

وان شاء الله راح احاول اطبق الطريقه على ولدي ،،،

يسعدك ربي عزيزتي