طريقة تحفيظ الاولاد القران

أحب اشارك بتجربتي المتواضعة في تحفيظ الاطفال القرآن الكريم لعلها تفيد أحد الأمهات في تحفيظ أولادها القرآن .
1- أولا لا بد من الاستعانة بالله تعالى وأخذ الأمر بجدية تامة والصبر الشديد لأن هذا الأمر ليس بسهل إلا لمن سهله الله له .

2- إحتسااب الأجر من الله تعالى على تحفيظ الأولاد القرآن لينا احنا الأمهات (( وكل واحد يدور على مصلحته !!! )) فقد قال رسول الله صلى الله عليه وسلم : " من قرأ القرآن وتعلَّم وعمل به أُلبس والداه يوم القيامة تاجاً من نور ضوؤه مثل ضوء الشمس ، ويكسى والداه حلتين لا تقوم لهما الدنيا فيقولان : بم كسينا هذا ؟ فيقال : بأخذ ولدكما القرآن " . رواه الحاكم

3- وضع حفظ القرآن كأولوية رقم 1 في حياة الأولاد … بمعنى أن سؤال (( حفظت القرآن المطلوب منك انهارده يا حبيبي ؟؟؟ )) يأتي قبل سؤال (( ذاكرت انهارده ايه في المواد الدراسية ؟؟؟ )) واضحة النقطة دي .. طب تماام . وتعقيب بسيط على هذه النقطة (( فأنا لا أقصد نهائي التخلي عن التفوق الدراسي للأولاد بل العكس هو الصحيح فمعظم من يحفظون القرآن الكريم هم من الأوائل بسبب بركة حفظ القرآن من ناحية ومن ناحية أخرى بسبب تعويد العقل على حفظ كميات كبيرة من القرآن فيسهل عليهم حفظ المواد الدراسية .. ودي نقطة أنا مجرباها بنفسي ولله الفضل والمنة ))

4- تحبيب الأولاد في حفظ القرآن الكريم وتوضيح مكانة القرآن الكريم في حياة المسلم وثواب قراءة القرآن وحفظه وكم الحسنات الكبير اللي هيجيله من وراء حفظه للقرآن .. ليه بقول النقطة دي ؟؟؟ لأن الولد أو البنت هيقارن نفسه وهو بيبذل مجهود في الحفظ بزميله اللي مش بيحفظ وبيقضي وقته في اللعب ويقول بينه وبين نفسه وأنا ايه اللي زنقني الزنقة دي ؟؟؟!! .. فلا بد من تفهيمه ان اللي بيحفظ هياخد ثواب كبير وان قراءة الحرف الواحد بحسنة والحسنة بعشر أمثالها و …… ومفيش مانع من امتداحه دايما قدام الأهل والأقارب بأنه ما شاء الله ممتاز وبيحفظ القرآن كنوع من التعزيز النفسي والأجتماعي ..

5- جعل هناك نظام خاص للحفظ مستمر طول السنة ملوش علاقة باحنا في الدراسة ولا الأجازة … الولد يحس انه من البديهيات انه يحفظ كل يوم ..

6- جعل لكل ولد أو بنت مصحف خاص به .. يُكتب عليه اسمه وغير مسموح له بالحفظ إلا فيه . طب ليه ؟؟؟ أقولكم ليه وركزوا معايا في النقطة دي لأنها مهمة جدا … وقت التسميع للولد ولقيته غلط في كلمة معينة أو تشكيل معين أحط تحت الكلمة دي خط بالقلم أو أضع على التشكيل الخطأ دائرة عشان لما يرجع يراجع الجزء ده مرة تانية يركز في الخطا السابق ودي نقطة مهمة جدا (( وإلا هنلاقيه بيكرر نفس الخطأ كل ما يراجع الجزء ده من القرآن .. مهمة جدا النقطة دي )).

7- مبدأ الثواب والعقاب : مهم جدا جدا وهو متروك لظروف كل أم .. بالنسبة لي حفظ صفحة جديدة = 1 جنيه —- حفظ سورة كاملة مثلا عشر صفحات وتسميعها بدون أي خطأ = 10 جنيه (( دي غير الجنيه اليومي بتاع الحفظ آآآه
– مراجعة 10 صفحات سابقة بدون خطأ = 1 جنيه – بالإضافة إلى وضع جوائز محددة ومتدرجة في القيمة على حفظ 5 أجزاء – عشرة أجزاء – نصف القرآن – ثلاث أرباع القرآن – القرآن كله قد تكون مبلغ نقدي أو هدايا محددة سابقا .. يعني تقول للولد لما تكمل 5 أجزاء مثلا هجيبلك محمول أو أي حاجة تانية المهم يكون فيه دافع للولد للوصول لحفظ الخمس أجزاء وهكذا …. مع مراعات التدرج بالزيادة في قيمة الهدايا المحددة سابقا
ما علينا .. من المهم جدا أن توعدي بما تستطيعين الوفاء به وأن يكون الجزاء فوري بدون أي تأجيل لأن التأجيل هنا في الجائزة هيجيب نتائج عكسية
– العقاب برضه مهم في موضوع التحفيظ زيه زي الثواب وهو برضه متدرج قد يشمل تجاهل الولد أو حرمانه من حاجة بيحبها زي لعب الكرة مثلا مع أصدقائه ويشمل أيضا العقاب المادي (( لاحظوا اننا في النقطة السابقة ادينالهم فلوس كتير أوي وجه الوقت عشان ناخدها منهم !!!! ) وأخيرا قد يشمل الضرب وإن كنت لا أميل لاستخدام الأسلوب ده ولكنه ضروري في حالة استنفاذ كل الوسائل الأخرى المتاحة