انصعقت إنو ليش بفكر بهالطريقة

السلام عليكم و رحمة الله و بركاته
أتمنى من الله أن تكونوا جميعاً بخير
في الحقيقة تمت خطبتي قبل شهر تقريباً (عقد قران)
قبل كتب الكتاب أول مرة ما استخرت بس دعيت الله كتير انو يختارلي الأحسن
و نمت و يومها شفت كابوس فظيع ما بعرف شو معناه .. يمكن لأنو كانت نفسيتي سيئة جدا وقتها و يمكن كان تنبيه ما بعرف شو بالضبط
المهم بعديها استخرت مرتين و بكل مرة ما كنت اشوف شي بس كنت انام بساعة متأخرة و كنت أفكر كتير و أصحى ألاقي جبيني منعقد و راسي بوجعني
فكرت إني أرفض بس الشب (خطيبي) كل الناس مدحوه و حكوا إنو اخلاقو عالية جدا و هوي أصلاً صاحب اخوي ومدحلي فيه كتير
المهم توكلت على الله و حكيت لحالي هاي كلها وساوس من الشيطان و وافقت و تم النصيب
أول يوم قعدتو مع خطيبي كان خجول شوي و صار يحكيلي عن حالو و كان طبيعي جداً و نفس الشي تاني يوم
و بعديها رجع لشغلو بس كنا نتواصل عالتلفون
و باول أسبوع كان يرنلي كتير و يبعت رسائل .. و كان يحكي كتير
بعديها صار يرنلي مرة بالأسبوع انا عاتبتو و حكالي إنو شغلو صعب شوي و بالفعل دوامو من الـ 8 صباحاً للـ 11 مساءً فـ أنا ما حبيت أكبر الموضوع و اخدت الأمر ببساطة مع إني كنت كتير مدايقة
طبعاً ما عملنا حفلة خطبة لأنو صار فيه كم ظرف و اختصرنا الموضوع بحفلة صغيرة جداً ..
يوم الحفلة لما أهله روحوا هوي ضل عندي كان مبين عليه إنو متدايق و كل هموم الدنيا فوق راسو و حسيت حرارتو كانت مرتفعة كتير .. المهم قعد شوي وبعديها روح .. و بعد خمس دقايق اتصل فيي و هوي عالطريق و صار يحكيلي بدي توعديني تسامحيني لو بيوم من الأيام ظلمتك و حكالي شغلة شلت تفكيري .. قلي بالحرف الواحد " وعد شرف لو صار بينا شي وتركنا بعض لا سمح الله مستحيل ارتبط بوحدة تانية إلا لو شفتك انتي مرتاحة"
انا انصعقت إنو ليش بفكر بهالطريقة .. صرت ابكي و هوي انجن ليش اني ببكي .. وقلي انا حكيت لا سمح الله لأني ما بدي اظلمك معي وقلي انو الشغلة كتير صعبة عليه و انو رح يخسر نص حياتو لو صار بينا شي بس ما بعرف شو اللي صارلو
بضل يحكيلي انو متدايق و بفكر كتير و قلي انو هالضيق الشديد صار معو من لما خطب
و بالفعل لما يحكي معي من بعد دوامو بكون مو طبيعي و واضح بصوتو الهم و الغم و لما اسألو شو فيك ؟ بحكيلي ما بعرف شو اللي بصير معي.. و على حسب ما حكالي انو كان يمزح و يحكي كتير بس من يوم الفحص الطبي انتكست حالتو .. و قلي انو صارت معو مشاكل كتير من بعد ما خطب .. انا قلتلو انته قصدك انو انا وجه شؤم عليك ؟ انزعج كتير و حكالي لا و الله مو هيك قصدي انتي ما فيه منك وما شفت منك إلا كل خير وبصير يمدح فيي ..
المشكلة إنو لما يكون عندي بكون كتير مرتاح حتى مرة حكالي ما بصدق واجي لعندك لأنك بتنسيني همي .. بس عالتلفون بكون مو طبيعي
طبعاً كعلاقة قائمة بين خطيب و مخطوبتو طبيعي يكون فيه مداعبات أحياناً .. و صرت احس انو اللي بريحو هاي الحركات انا ما بدي شيء مبالغ فيه بس هوي شوي اندفاعي .. امبارح سألني رح تسامحيني لو لا سمح الله صار شي ؟ حكيتلو انا بطنش بس ما بسامح
و بعديها تعكر مزاجي فضمني لإلو و بعد شوي صار بدو يبوسني فأنا حكيتلو انته اناني قبل دقيقة بتحكي عن الانفصال و هلأ بدك تعمل حركاتك ؟ حكالي انتي حلالي و من هالحكي
ما بعرف شو أعمل .. و الله نفسيتي كل ما فيها بتصير أسوأ .. و السبب خطيبي
هلأ بدي حدا يشور علي .. اللي بصير معي خطيبي طبيعي و لا فيه شي غلط بالموضوع ؟
و على فكرة اهلي و أهلو كتير متفاهمين و علاقتي مع أهلو جيدة جداً و كل شي تمام ما عدا نفسيتو اللي كل ما فيها بتصير أسوأ
طيب أنا شو لازم أعمل مشان أريحو ؟ شلون لازم أتصرف لما يصير يحكيلي عن موضوع الانفصال (لا سمح الله ) ؟ و حركات البوس و الأحضان (اللي صار يزودها كتير مؤخراً) أمنعو عنها ؟ مع العلم انو كتييير بتدايق و بعصب لما ما أخليه ..
أحياناً بحس السبب مني إني ما بطلعو من حالتو السيئة لأنو كلامي قليل و هيك بس و الله بتعامل معو بطريقة راقية جداً و هوي كتير بيمدح بشخصيتي بس ما بعرف شو اللي بصير فينا .. عين و لا تعب جسدي تحول لنفسي و لا شو بالضبط
أرجوكم تتحملوا طول الموضوع و ركاكتو.. اصلاً كتبتو و انا تعبانة نفسياً
و الحمد لله على كل حال ….

اختي اجلسي معاه واسأليه ليه فكر يتركك وخليك صبوره متحكمه بردات فعلك والحي انو مايطلع لين يقولك السبب لان من حقك تعرفين .. فهذي حياتك ايضا ومن حقك ان تعرفين السبب اللي غيره ويتعب نفسيته وخلك جاده مع كثير من الصبر وخفض الصوت حتى يتمكن من ان يحكي لك حتى تستطيعين بعد هذا ان تتصرفين وقولي انا ستر وغطاء عليك مهما صار ماراح يطلع من بيننا هالسر لكن لايطلع حتى تعرفين اسبابه
اللي تخليه يفكر بالانفصال لعله مثلا عقيم ؟؟ او اي شيء اخر تأكدي قبل ان تظلمينه وراعي نفسيته
الله يصخركم لبعض يارب

المشاركة الأصلية كتبت بواسطة شماليه كفو بسم الله الرحمن الرحيم اختي اجلسي معاه واسأليه ليه فكر يتركك وخليك صبوره متحكمه بردات فعلك والحي انو مايطلع لين يقولك السبب لان من حقك تعرفين .. فهذي حياتك ايضا ومن حقك ان تعرفين السبب اللي غيره ويتعب نفسيته وخلك جاده مع كثير من الصبر وخفض الصوت حتى يتمكن من ان يحكي لك حتى تستطيعين بعد هذا ان تتصرفين وقولي انا ستر وغطاء عليك مهما صار ماراح يطلع من بيننا هالسر لكن لايطلع حتى تعرفين اسبابه اللي تخليه يفكر بالانفصال لعله مثلا عقيم ؟؟ او اي شيء اخر تأكدي قبل ان تظلمينه وراعي نفسيته الله يصخركم لبعض يارب

أهلاً فيكي اختي شمالية
بالنسبة للسؤال و الله تلات أرباع كلامي معو عن سبب الضيق الغريب اللي بصير معو
ما بعرف شو مشكلتو بالضبط و الأدهى و الأمر إنو بيحلفلي انو هوي نفسو ما بيعرف شو اللي بصير معو 🙁
قبل ساعتين اتصل فيي و كان الضيق واضح بصوتو و حكالي إنو صار يخاف على حالو ينجن انا صرت ابكي و ما بعرف تقريباً انهارت اعصابي و حكيتلو خلص خلينا نترك بعض و انا ببكي و حالتي حالة .. بعديها سمعت صوت شقهاتو و حكالي خلص لا تكملي مشان الله و صار يرجف .. و قلي ما تجيبي هالسيرة مرة تانية
انا و الله ما فيي شي كل ضيقي و همي زعل عليه و مشانو ..
كل الأشياء اللي بتصير معو غريبة عجيبة .. بحكيلي انو صار يحكي مع حالو و بكون بدو يروح لمكان بلاقي حالو بمكان تاني و هوي طبعو بيمزح كتير و دمو خفيف بس من وقت ما خطب انقلبت شخصيتو 180 درجة و بطل يحكي مع حدا او يمزح و دايماً سرحان و هاي الشغلة لاحظتها فيه كتير .. و الله تحيرت بطلت حتى أعرف أفكر
الشي اللي بصير معو شي كبير بس مو قادرة لا أنا و لا هوي نعرف شو فيه..
دايماً بدعي الله يبعد عنو الهم و النكد و حتى إيماني بهاي الفترة ازداد .. و من بعد الله سبحانه و تعالى ما إلي إلا نصائحكم ..
يعني اللي صار معها أو مع حدا من معارفها شي متل هيك يا ريت تحكيلي تجربتها
و شو بتنصحوني أعمل ؟ .. و من خلال اللي حكيتو قدرتو تستنجو شي عن سبب ضيق خطيبي يمكن انا ما قدرت أفهمو أو أستوعبو ؟ أنا خبرتي بهيك مواضيع قليلة يعني طبيعتي مو اجتماعية و ما بعرف شلون أتصرف أحياناً 🙁
آمين الله يسمع منك حبيبتي عن قريب يااااااااااااا رب