ياحسرة الضميان لا شارف على العدَ السراب !!

ويادمعة الطفل اليتيم اللي شكا عظم المصاب
اعزل ومجروحٍ يكابد قوَ باس المعتدي

ويا ضيقة الرجَال لا صكَت بوجهه كل باب
صبره جميلٍ // مير صبر الادمي مستنفدي

ويا خشية النَادم ليا راجع ذنوبه يوم تاب
يخاف منها لا تودَيه العذاب السرمدي

ويا حيرة السائل ليا شاف الخطا ضمن الجواب !!
بالذات لا من جاوبه من عدَ نفسه مرشدي

ما عاد باقي من حياة الادمي غير الذهاب
اليوم ولا مع طلوع الشمس في صبح الغدي

رحلة وداع ٍ لا انتهت مابعدها رحلة إياب
مابعدها الا الحشر في يومٍ عظيم المشهدي

يا مدَعي بالعلم رش الشيب جنحان الغراب
مدري من الشوكة طلع؟! ولا من الورد الندي ؟!

احسب حسابك قبل لا تبلش ليا حلَ الحساب
ما ينفعك لا ضعت عشَاق القوام الاجردي !!

قلته وانا مونس على قلبي مثل شلفا ذياب
حسبي على الآوهام والآحزان والحظ الردي !!

ما اشدَ من حزن اليمامة غير حزنك ياعقاب !!
ولا اهون من ابيوت العناكب : غير مسلول البدي

هذي مشاعر صادقة عدَت على متن السحاب
تبقى سما فوق السحاب .. وتجلس اوزان الجدي

يالله دخيلك يالرحيم المستعان امن العذاب
لتواخذ الامَة بجَهالٍ خفاها المقصدي