حماتى وسلفتى الله يرحمهم حكايه ولا الف ليله وليله

السلام عليكم اخواتى الغاليات على قلبى يارب انكم بخير حال القصة منقولة مانى الا ناقلة

بسم الله الرحمن الرحيم

انا متزوجه من سنين جوزى له خمس اخوات رجاله واخت واحده
كلهم متجوزين جوزى رقم 2 فى اخواته فيه اكبر منه اخ كان متزوج قبله ب 10 سنين وعنده اولاد انا مش هحكى حاجه عنى كل دورى
فى القصه دى انى مرات واحد من الاخوه دول لانى لما تجوزت
عشت بعيد عن عيله جوزى لظروف شغله
هحكى حكايه سلفتى مرات اخو زوجى الكبير وحماتى ومهما احكى لا يمكن هوفيهم حقهم
سلفتى دى كانت اقرب الى الملائكه منها الى البشر كانت بتحب كل الناس وبتسامح من غير حدود عمرها ما غلطت فى حد ولا لسنها نطق العيبه وكانت لما اروح ازورهم تبقى محتاره تعمل ايه ولا ايه وكانت ديما وشها سمح وديما بيضحك والكل كانوا بيحبوها
اتجوزت وكانوا اخوات زوجى الصغيرين لسه اطفال
كانت بتخدمهم كأنهم ولادها وكانوا بيحبوها كأنها امهم اللى خلفتهم
عاشت مع حماتي 27 سنه كانت اكتر من بنتها كانت روح حماتى فيها
حماتى كانت ست طيبه جدا وعلى فطرتها حماتى كانت متعلقه جدا بسلفتى دى وكانت ديما تقول دى بنتى التانيه اقولها ياماما
يعنى احنا مش ولادك تقول كلكم ولادى بس فلانه
عشرت عمرى وسندى كانت حماتى لما تتعب كانت سلفتي تخدمها
زى والدتها واكتر وترفض تكلم بنتها تيجى تخدمها وتقول عيب دى امى
لدرجه انها كانت تحميها وتغسل هدومها مكنوش يكلوا ولا يشربوا غير مع بعض لما بدئت سلفتى اول مره يجلها جلطه حماتى
مبقتش تنام وقاعده تحت رجلها تخدمها ولما حد يقولها ارتاحى
تقول محدش هيخدم فلانه غيرى كانوا متعلقين ببعض جدا
لحد ما جه اليوم الموعود وسلفتى تعبت وراحت المستشفى
ورجعت بيتها وهى ميته حماتى او ما شافتها اغمى عليها
ولما فوقوها مكنتش مصدقه وعندها حاله ذهول
وكل اللى تقوله بنتى بنتى واللى يجى يصبرها تقول هعيش فى الدنيا دى بعدها ازاى
حماتى كانت بكامل صحتها كانت بتسافر فى اى مكان وكانت بتزورنا
وتزور بنتها وبعد موت سلفتى مع كتر الحزن عليها المرض اتمكن منها
ومبقتش تكلم حد وفضلت مريضه لحد ما ماتت
بعد سلفتى ب 6 شهور حزنا عليها و البلد كلها بقت تترحم عليهم
يا ترى فى زمنا ده ممكن حما تموت من الحزن على مرات ابنها
الله يرحمهم ويحسن اليهم
اللهم وسع مدخلهم وؤنس وحشتهم واجعل قبرهم روضة من رياض الجنة واجعل مثواهم الفردوس الاعلى اللهم امين اللهم بلغت اللهم فاشهد على ما اقول