تحذييير من النصب الالكترونى والوظائف الوهمية

السلام عليكم
أنا جديدة بالمنتدى وعايزة أقدم نصيحة مهمة جدا من واقع تجربة مريت بيها لكن الحمد لله
انى موقعتش في فخهم ومكنتش ضحية ساذجة من ضحاياهم ولله الحمد زى ما العنوان بيقول كده -انا كنت قدمت على موقع مونستر جلف طبعا معظمنا عارفينه سجلت عليه سي في ليا
وبعد شهر تقريبا لقيت جالى أوفر شغل في أبوظبي من Howard International school ومدير ال HR اسمه DR. CARLSONوقالوا انهم شافوا السي في بتاعتى وانها مؤهلة بقوة للوظيفة المطلوبة لكن لسه موافقوش عليا لسه في اختبارات في الانجلش وفي التربوى وبعتولى لينك لأون لاين كوسشنير مطلوب بيانات عنى وعن خبرتى وبقية الاسئلة في الانجلش وفي التربوى وكان مقنع جدا لحد هنا
بعد كذا يوم قالى انى نجحت مبدئيا وهيتصلوا بيا برده وبعد كده بعتلى أوفر مغرى جدا جدا ووافق كمان انى اخد أسرتى معايا ووافق على كل حاجة طلبتها ودى حاجة شككيتنى شوية
بعد كده بعتلى نسخة من العقد 3 صفحPDF مليانة بنود لا حصرلها تقولى ده عقد بجد

لكن في بند كان انى هتواصل مع شركة سفريات هناك عشان هى اللى هتطلعلى الاقامة وتصريح العمل وما الى ذلك والشركة دى اسمها أريبيان تورز وحاطط ايملها وعنوانها وارقامها .
وتانى بند قلقنى وخلانى أتأكد ان دى نصب بنسبة 99% انى هدفع للشركة دى كل مصاريف الاقامة والاوراق اللى هتعملها وقالى انى بمجرد ما هوصل ابوظبي بعد خمس أيام هيدينى كل المصاريف اللى دفعتها بس لازم يبقى معايا فواتير تثبت ده
والسبب انهم مش هيدفعولى كل الحاجات دى او هيعملولها بنفسهم انهم عملوا قبل كده وبعدين الناس مجتش اللى يقوله حصلى ظروفى أو حد جاله عرض أفضل . وده بالنسبالى زود شكي لأنهم عارضين راتب مباااااااااااااااااااااااااااالغ فيه وسكن وتأمين واستقدام أسرة من اليوم الأول كمان.
انامشيت معاهم للأخر قولت أنا مش خسرانة حاجة لما أكشف كل حيلهم وبالمناسبة كان طالب انى اوقع على العقد وابعتلهوله .
المهم راسلت شركة السفريات وقولتهم انى جالى عرض من مدرسة وقالولى اتواصل معاكو عشان اعرف هعمل ايه- ولعلمكو براسل المدرسة والشركة بالانجلش مع انها اريبيان تورز والاسم اللى مذكور يدل على ان المسئول شخص عربي – وبقدرة قادر عرف اسم المدرسة وعرف العرض مع انى مقولتش تفاصيل -وطلب ابعتله شوية اوراق منها صورة باسبورى وشوية حاجات والاهم المصاريف كام 1250$ ؟؟؟؟
بعت للمدرسة قولتله المعروف ان صاحب العمل هو اللى بيتكفل بالتأشيرة والتذكرة وكل المصاريف الادارية طالما الموظف طالع على كفالته او اسم شركته – رد عليا وقالى انا وضحت في العقد السبب (اللى هو ان الناس مبتجيش زى ما قولتلكوا) وان دى سياستهم ومش هيغيروها .وفي اللحظة دى كان التأكد بنسبة مليييييييييييييون في المية والحمد لله انى مكنتش ساذجة وبعت .
على فكرة من البداية كنت عملت سيرش عن المدرسة دى ملقتش لها وجود حتى في موقع خاص بالوزارة في امارة أبوظبي
وبعد ما كنت جبت أخره خالص وعرفت كل حاجة عملت سيرش وكتبت فيه اسم المدرسة لقيت تعليقات من قراء بيسألوا عن المدرسة دى وحكوا نفس اللى حصل معاهم لكن في للأسف ناس حولت الفلوس على الشركة اللى هما اكتشفوا انها وهمية هى كمان. ولقيت مهندسين للأسف ودكاترة تم خداعهم ودفعوا اما بالدولار او الدرهم مبالغ وبعد كده عرفوا اختفوا فعرفوا انهم اتنصب عليهم .
للأسف الناس دى معندهاش ضمير بستتغل حاجة الناس في الوطن العربي وللأسف أيضا منعرفش قنوات او طرق نقدم فيهم بلاغ بحيث يتم ضبطهم او نحذر الناس منهم.

في النهاااااااااااااااااااااااية متأسفة انى طولت عليكم يا بنات بس دى كانت حاجة في رقبتى وكنت هحس بالذنب لو حد اتنصب عليه خصوصا من نفس الاشخاص دول او من اى ناس تانية عشان كده حكيت اللى حصل بالتفصيل عشان يبقى عندكوا فكرة تفصيلية .