مساء الخير عزيزاتي
بسرد لكم قصتي التي اتمنى الا تحصل لاي وحده فيكم
انا لي ثلاث سنوات متزوجة وكانت ايام الخطوبة ما اقول لكم انها مش زينة بس مرت علي ايام من اتعس لحظات حياتي وهي ان زوجي في ذاك الوقت كان كثير السفر مع الشغل وكانت كل سفرة يسافرها ما يستغني فيها عني ويكلمني يوميا في الجوال ويطمني عليه
لحد ما جاء ذاك اليوم المشؤوم يوم طلب مني اسوي له ايميل لانه هو ما يعرف يسوي , وفعلا سويته مع الرقم السري الي انا احتفظت فيه
وبعدها بشهرين اكتشفت ان معاملته تغيرت معاي ما عاد مثل اول يسئل عني وصار يفتعل لي مشكلة كبيرة لو ما اتصل فيه , انا في البداية ما حطيت في بالي ان في شي مو طبيعي لانه كان يحسسني ان انا خجوله وخجلي ماله معنى بما انه زوجي على سنة الله ورسوله. وبعد ها السالفة باسبوع سافر امريكا مع الشغل بدورة , ومن يوم سافر انقطعت عني اخباره لا اتصال ولا مسج , ولما اتصل فيه كان ما يرد . وكنت اعرف ان يشوف رقمي وما يبي يرد . بتسالوني شلون عرفت لاني اتصلت فيه مرة اكثر من 5 مرات ما رد علي . وبعدين طرشت له مسج وقلت له انا مريضة وبسير المستشفى بنفس اللحظة رد وقال لي روحي وقفل الخط . والمسالة ما جات على التلفون حتى لما يشبك على الماسنجر يشوفني ادخل على طول يغير الوضع للخارج او عدم اتصال وما يرد علي .
هني شكيت في الموضوع وان له علاقة مع وحده .
المهم طرشت له مسج من الجوال واتهمته ان على علاقة وانا متاكدة . على طول رد علي بعد مدة طويلة من القطيعة ونكر وعشان ما اشك فيه قام يتصل يوميا . المهم انا صدقته لانه ما عندي دليل ضده . ولما رجع من امريكا صارت مشكله بين عائلتي وعائلته لسبب سخيف ,كانت بتسبب طلاقي المهم وصلت للمحاكم بسبب تهجم امه على ابوي وابوي هددهم انه يطلقني منه .
وانا رجعت المياه لمجاريها . وبعد ما هدت الاوضاع قال بسافر السعودية ارفه عن نفسي وسمحت له بالسفر واغلق جواله عشان ما اتصل . وبعدها باسبوع حوالي الساعة 4 فجرا بذاك اليوم المشؤوم طرش لي رسالة غرام موجهه لامراة اخرى عرفت انها مب لي لانه كاتب فيها والله والله احبك فلانة من فلان .
هني انا فقدت اعصابي وطرشت مسج وقلت من فلانة . ما رد علي الا بعد 8 ساعات يدور له عذر غير منطقي . المهم انا سكت لاني كشفت لعبته اللي الله راد انها تنكشف , وقررت افتح ايميله لتكون المفاجئة . كان مليان بنات وواجهته وقال لي انهم خالاته وعماته وبناتهم المهم ما صدقته .
وسكت عن الموضوع لحد حفل زفافي عدى على خير وبعد ما صرت عنده طلبت منه يعطيني جهازه المحمول ووافق على مضض خذته وفتحت سجل محادثاته لما كان بامريكا واكتشفت انه كان على علاقة بوحده وهي نفسها الي طرش لي رسالة باسمها بالغلط .
خذت ايميلها وسويت لي ايميل ثاني وضفتها عليه . بس قبل لا اكلمها واجهت زوجي وقلت له انت تذكر فلانة الي طرشت لي رسالة باسمها بالغلط ممكن اعرف من هي نكر وحلفته بالمصحف ورفض يحلف عليه وبعدها حلف وهو كذاب وبعدين اظهرت له الدليل انه كان يحادثها وغضب مني وقال ليه تجسستي علي وهددته بطلب الطلاق اذا تكررت مرة ثانية وحلف لي انه ما راح يكررها .
المهم انا كلمتها على الماسن وسالتها عنه بالبداية انكرت ولما قلت لها انا زوجته اعترفت انه كان يحبها ووعدها بالزواج وامه رفضت .
يا ليت هي وقفت على ها الموضوع المصيبة بعد اني كتشفته يكلم بنات بكلام فاحش بفترة الملكة من خلال سجل المحادثات وانه كان يسافر عشانهم .
صحيح هو وعدني ما يكررها بس الجرح بقلبي كبير وما اقدر انسى واشك بكل تصرفاته مهما حاول يثبت لي عكس ها الشي .
والشي الثاني اللي انا مهب مرتاحة منه هو اني حاسة عنده مشكله بالانجاب لاني تاخرت 3 سنوات ولما كشفت قالو لي انتي سليمة ولما اقول له روح للفحص يرفض بشدة . وبدو اهله يتكلمون علي وانا قلت لامه انا فحصت وطلعت سليمة لاني تعبت من الكتمان . ومن يومها ما قامت تضغط علي بالانجاب .
انا وصلت مرحلة اليأس وافكر بالطلاق اولا لاني ما اقدر انسى ماضيه وثانيا لانه لحد الحين ما انجبت منه ويمكن هاي خيرة وانا احس اني ما اصلح له للعلم انه بعد ما كشفت خيانته صار معاي طيب بس انا احس اني ما اقدر اعيش معاه .
سامحوني على الاطالة وادري اني عذبتكم معاي وفعلا القصة اللي انا قلتها لكم صار لها مدة بس انا ما لقيت غيركم افضفض له .
الله يوفقكم دنيا واخرة وبنتظار اراكم .
والله ماادري ايش اقولك يااختي
من جد قصتك تحير
طيب اذا انتي تاكدتي انه تغير حاولي تنسي ماضيه لانك ماراح تجني غير التعب والشك بتصيري حتى وهو نايم بانه يكلم غيرك
اما على قصة الانجاب حاولي معه بالطيب انه يروح يكشف واذا مانفع هدديه باهلك بانك بتقوليلهم يمكن يخاف ويكشف واذا عرفتي النتيجه ايجابيه او سلبيه لكي الخيار مااقدر اقولك تطلقي او ضلي معه لان هذي حياتك ياقلبي
وربي يوفقك ويهدي زوجك
والله ياعمري انت من البدايه عرفتيه
من ايام الخطوبه
بلاه هالزواج كان من الاول
يعني شوفي عزيزتي
حال الناس كلها من يوم بدت الخليقه
فترة الخطوبه هي احلى فتره
والناس تظهر اجمل ماعندها
ولو هي حاله مو صحيحه ولكن هذا اللي يصير
انت من ايام الخطوبه وهو تعيس جدا
انا مو عارفه انت ليه استمريتي معاه؟
من قلة الرجال يعني؟؟
المهم
الان نجي على الحاضر
ان كانت خياناته مستمره فأعلمي ان حياتك ستستمر على هذا المنوال
فأمامك الرفض او القبول
ولن اتطرق لموضوع الانجاب لانني اعتبره الان غير مهم
فلو كان زوجك يتعامل معك بمايرضي الله فاستمري معه حتى ولو كان عقيما
اما ان كان يعذبك بخياناته وعلاقاته المشبوه فأنا لاانصح اي شابه بالاستمرار بحياة مروعه غير امنه مع انسان لايحترمها اذا لم يكن هناك اطفال على الساحه
تحياتيييييييييييييييييي
السلام عليكم اختي
تريثي شوي كان ماضي وراح واذا هو ارتد عن هالسوالف وربه هداه اتركي الماضي بس سالفة الانجاب لازم تصري عليه يروح هو يفحص دام انتي فحصتي وعاد بعدها قرري وش راح تسوي اذا طلع صاحي اصبري وادعي ربك يرزقك واذا فيه عيب وما ينجب لك حرية الاختيار في تركه لأن كل واحد يتمنى الذرية الصالحة
سلامي عزيزتي
عليكي بكثرة الاستغفار وقراءة سورة البقرة يةميا قدر المستطاع وقيام الليل لأن فيه بركات استجابة الدعاء
اشوف اطردي ابليس زوجك بالعكس طيب معك
وانه يكلم بنات ترا ذا عنده مراهقه متاخره حاولي تحليين الوضع اللي هو فيه بدون انك تخربيين بيتك
قسم اني اعرف بنت زوجها يكلم وبعد غير بس يتزوج وعلى ذا كله متسدح باليت وهي اللي تصرف وعندها طفليين
شوفي مصبيت غيرك تهون مصيبتك
وعلى فكره حاولت تتطلق منه لكن القاضي حسبي الله عليه وقف مع زوجها الظالم .. ياحسفه على على لحيته اللي تقول مكنسة
يلا ماعلينا قاضيان بنار وقاض بالجنه هم الخسرانيين
فايا اختي هدي وستعيني بالله هو القادر على كل حال
وهو القادر على تبديل الاحوال
والعجله واللجه والضجه ماتفيد شيء
حولي تتصرفيين مع الموضوع بحكمه وربي يساعدك
تحياتي
مالك الا الدعاء واستخيرى الله
الله يكتب لك مافيه الخير
اتعرضت للخيانه مثلك بس حاولي تحلي الموضوع ونسي وسامحي يا قلبي ولا يهمك وادعي ربك بعدين احكي شو قصتي