تكملة قصة ولادتي الثانية

رح اكمللكم قصة ولادتي الثانية … وصلنا لما بلشت بالتاسع

طبعا الشهر التاسع متعب جدا .. يعني عن كل الشهور اللي مضت

وكل يوم بدعي فيه اني اولد بأوله وما اضل لأخره .. بس الحمد لله على كل حال

وبهاد الحمل قررت اصبر على حالي لحتى يصير معي طلق طبيعي..

لإنه الطلق الصناعي صعب كتير ..

المهم … بليلة من الليالي صار معي وجع .. بس خفيف مو كتير

وابو الشباب صار يحكيلي شو رأيك نروح المستشفى .. حكيتلو خلينا نصبر شوي

المهم .. ضل الوجع ساعتين تقريبا بعدين راح

وحكيت لأبو الشباب يروح ينام … شكلو الولد بمزح .. او بلعب بأعصابي

المهم .. راح ابو الشباب ينام .. وانا ما قدرت انام

اجى الصبح .. وزوجي حكالي انه بدو يعطل .. خايف اني اولد وهو بالشغل

المهم .. صار عندي كمان شوية وجع الصبح ..

بس برضو مو حامي كتير

بس ما حكيت لزوجي بلاش يصير فينا زي امبارح

عملت فطور .. وجهزت البيت ورتبت اموري كلها ..

وجهزت بنتي … وطبعا زوجي بلش يحس اني كل شوي بتوجع ..

صار يحكيلي شو مالك .. في شي …

حكيتلو في عندي وجع بس مش كتير ..

المهم… بلش الوجع يزيد .. بس كمان ما تتخيلو اني بصرخ

لا عادي كنت بحكي وبمزح ..

المهم حكيت لزوجي خلينا نروح على الدكتورة .. بلاش نروح ع المستشفى وما يكون ولادة ..

وافق طبعا .. وراح يودي بنتي زينة عند اهله ساكنين بالطابق التاني ..

وسلمت عليها وصرت ابكي .. حسيت حالي ما رح اشوفها مرة تانية

المهم .. اخدت دوش .. واجت حماتي وحكت بدها تروح معنا .. ورحنا

ع الدكتورة .. وحكتلنا ولادة .. وكان التوسع 3 سم ..

رحنا ع المستشفى .. ودخلوني على غرفة الولادة .. وعطوني روب وغيرت ملابسي

وعملتلي فحص وحكتلي التوسع 5 سم

ولهلأ الحمد لله الوجع مو كتير وبنفس الوقت خايفة كتير

وكانت بجنبي وحدة بتولد وشكلها صارلها زمان … وعم تتوجع وتبكي

كتير حزنت عليها .. وكل شوي كان زوجي يرن ع غرفة الولادة ويسأل عني

ويحكولو لسه مطولة ..

المهم ضليت ادعي ربنا انه يسهلي الولادة ..

وبلش الوجع يزيد .. صار يزيد كتير .. بس ما صرخت ابدا .. مو متل الولادة الاولى

واجت تفحصلي التوسع ولقيته 8 .. انبسطت كتير

بعد ما صارلي ساعة ونص بطلت اتحمل الوجع .. وحسيت انه في اشي بدو يطلع..

صرت انادي على الممرضة.. اجت تفحصني .. حكتلي بسرعة خلص ولادة

نقلتني على كرسي الولادة..

وكنت مستنية انها تعطيني ابرة قبل ما يطلع الراس..

وهون الصدمة .. طلع ما في ابرة ..

وانا هاد الوجع ما جربته من قبل ..

صارت تحكيلي شدي كتير وما تصرخي .. كنت احاول بس كان صوتي يطلع غصب عني

ولو المكان ما كان مسكر كان صوتي وصل لعندكم ..

المهم وانا بشد لما كان البيبي يطلع .. ضغطت على راسه .. والدكتورة خافت ينخنق ..

وصارت تضغط على بطني لحتى طلع ..

وحسيت حالي ارتحت كتير ولا كإنه كان في وجع ..

لما شفته طلع مني انصدمت انه هاد الانسان كان جواتي .. سبحان الله

وصارت الممرضة تحمم فيه قدامي وجابتلي اياه ابوسه..

المهم .. بعدها حطتلي بنج موضعي وعملتلي الغرز ..

وحكيتلها خبري زوجي .. وحكتلي خبرته اول ما ولدتي..

حطوني ع السرير ونقلوني لغرفة تانية ..

واجى زوجي وحماتي .. وحكيت مع امي وانبسطت كتير

ونمت يوم بالمستشفى .. وطبعا ما عرفت انام .. لإني كنت قلقانة ع بنتي

مع اني حكيت لزوجي يروح عشان يدير باله عليها

بس ضليت قلقانة

وهلأ ابني عمره 10 شهور وصار يمشي