اوفر واسهل معجنات مقلية لولادك عشان الفطور والمدار

السلام عليكم ورحمة الله وبركاته
انا هاوريكم يا بنات اسهل واوفر مقرمشات او معجنات لولادك مقلية
يفطروا بيه قبل المدرسة او ممكن يخدوها معاهم كمان واضمن من مقرمشات الشارع اللى كلها مواد حافظة ومكسبات طعم ولون ورائحة
بصى يا ستى المقادير بسيطة واى حاجة عندك
دقيق وبيكنج بودر وزرة ملح وبس
نص كيلو دقيق على معلقة بيكنج بودر على زرة الملح وتعجنى بالميه عادى وتخلى العجينة معاكى متما سكة ولا ناشفة ولا سايحة تعرفى تمسكيها وتسيبيها ترتاح نص ساعة عشان تتفرد معاكى بسهولة تكوريها كور كدة وتفردى بالنشابة على الرخامة
ومترفعيهاش قوى اتخن من الرقاقة شوية وتقطعى نصين كدة او تلاتة وتحشى اى حاجة عندك فى التلاجة بواقى جبنة بيضاء او قريش او رومى
بسطرمة لانشون اى حاجة تنفع انا حطيت جبنة فيتا ونفعت عادى وتلفيها بقى كدة زى المحشى هههه وبعدين تقطعيها قطع وتحمريها وممكن تفرزيها كمان لاى وقت براحتك
وادى شكلها لما اتحمرت مبتشربش زيت خالص على فكرة والجبنة ساحت جواها وبقت طرية من جوه ومقرمشة من بره وطعمها خطير
الزيت متوسط الحرارة عشان متتحرقش من بره وتكون لسه عجينة من جوه
ومرة تانية عملتها بنفس الطريقة بس حشيت بلح تمر متبقى من رمضان وكانت تحفة يعنى عملت منها حلو وحادق
وممكن تحشى شيكولاتة او اى حاجة تحبيها كمان
وبكدة نكون عملنا لولادنا مقرمشات محشية وسهلة وموفرة ومضمونة وعلى فكرة بترمى معاكى كتير
اهو الطبقين الحلو والحادق
وعلى فكرة ممكن تتحشى اى بانيه بايت عندك او بوفتيك او لحمة مفرومة وهاتبقى عاملة زى السمبوسك وهاتعجبهم قوى والله لانها عجبت ولادى جدا

والف هنا لولادكم ويارب تعجبكم

تقبلي مروري